Сәтбаевта дүниеге үшем келген отбасына пәтер берілді
ҚАРАҒАНДЫ. 4 желтоқсан. ҚазАқпарат - Қарағанды облысының Сәтбаев қаласында дүниеге үшем келген Құлтасовтар отбасына төрт бөлмелі пәтер сыйға берілді. Бұл туралы Қазақмыс тобының корпоративтік байланыстар департаментінен хабарлады.
«Оңтүстік Жезқазған кенішіндегі № 25 учаскенің 28 жастағы бастығы Асхат Құлтасовтың көпбалалы отбасы сыйлыққа төрт бөлмелі пәтер алды. Баспананы Қазақмыс тобы үшемнің дүниеге келуіне орай бөлді», - делінген хабарламада.
Кішкентай үш баласы бар Құлтасовтардың отбасында тағы да үш бала дүниеге келді. Сәбилерге Нұрсұлтан, Бексұлтан, Маржан есімдері берілді.
«Қазақмыс» отбасына сондай-ақ материалдық көмек көрсетті.
Отбасы иесі компанияға қолдауы үшін алғысын білдірді.
