Сайлау алқасы АҚШ-тағы президенттік сайлаудың қорытындысын растады
АСТАНА. KAZINFORM — Сейсенбі күні АҚШ-тың 50 штатының астаналарында сайлаушылар алқасы 2024 жылғы президенттік сайлауда сайланған президент Дональд Трамптың вице-президент Камала Харристі жеңгенін ресми түрде бекітті, деп хабарлайды Kazinform тілшісі CBS News-ке сілтеме жасап.
АҚШ Конституциясының 12-ші түзетуіне сәйкес, америкалықтар сайлау күні президент пен вице-президентті таңдауды қолдауға уәде беретін сайлаушылар алқасының тізіміне техникалық түрде дауыс береді.
Осылайша, сайлау күніне қарай әрбір штатта Демократиялық және Республикалық партиялар ұсынған сайлаушылардың екі тізімі болады. Сайланған соң, сайлаушылар АҚШ президенттігіне кандидатқа дауыс береді. Ресми тұрғыдан олар сайлаушылардың еркіне сай дауыс беруі керек, бірақ мұндай талаппен федералды заң жоқ, тек көпшіліктің еркіне сай емес дауыс бергені үшін айыппұл (ең көбі $ 1000) салынады. Сонымен қатар, барлық дерлік штаттарда сайлаушылар оларды тағайындаған партия алдында жауап береді. Осы уақытқа дейін бірде-бір сайлаушы басқа кандидатқа дауыс бергені үшін жауапқа тартылған жоқ.
Сайлау алқасы дауыстарының саны 1964 жылдан бері 538 болып қалды, бірақ олардың саны штат бойынша өзгеруі мүмкін. 2020 жылғы сайлау мен 2024 жылғы сайлау арасында Техас сайлаушылар алқасының екі дауысын алды, ал бес штат (Колорадо, Флорида, Монтана, Солтүстік Каролина және Орегон) әрқайсысы сәйкесінше бір сайлау дауысына ие болды. Сәйкесінше, жеті штат әрқайсысы бір сайлау дауысынан айырылды: Калифорния, Иллинойс, Огайо, Мичиган, Нью-Йорк, Пенсильвания және Батыс Вирджиния.
48 штат пен Колумбия округінде (Вашингтон қ.) «жеңімпаздың барлығын алу» жүйесі бар. Сондықтан штаттың жалпы дауыс беруінің жеңімпазы штаттың барлық сайлау дауыстарын жеңеді. Оған кірмейтіндері — штат бойынша жалпыхалықтық дауыс беру негізінде сайлаушыларды анықтайтын Мэн мен Небраска.
Нәтижесінде Дональд Трамп сайлаушылар алқасының 312 дауысын, ал Камала Харрис — 226 дауыс жинады. Сайлаушылар алқасы 538 адамнан тұрады және президент болып сайлану үшін 270 дауыстың көпшілігі қажет. Ұлттық деңгейде Дональд Трамп 77,2 млн, ал Камала Харрис 75 млн дауыс жинады.
2025 жылдың 6 қаңтарында Конгресс сайлаушылар алқасының дауыстарын санау және сайлау жеңімпазын жариялау үшін бірлескен отырыста жиналады.
Дональд Трамп пен жаңадан сайланған вице-президент Джей Ди Вэнс 2025 жылдың 20 қаңтарында түсте ант қабылдайды.
Бұған дейін Time журналының нұсқасы бойынша жыл адамы атағы АҚШ-тың жаңадан сайланған президенті Дональд Трампқа бұйырғанын жазған болатынбыз.
