Семейде жүріп бара жатқан маршруттық автобустан өрт шықты

АСТАНА. ҚазАқпарат - Оқиға 1 қыркүйекте Семейде Православ шіркеуі маңында, Абай көшесі бойында орын алды.

№13 маршруттық автобус өз бағыты бойынша келе жатқан уақытта моторының артқы бөлігінде өрт шыққан, деп хабарлады ШҚО ТЖ департаментінің баспасөз қызметі.

Автобус жүргізушісіне оның көлігі өртеніп жатқандығын жанынан өтіп бара жатқан көлік жүргізушісі айтқан, ол автобустың артқы бөлігінен түтін шығып жатқанын байқаған. Осы уақытта салонда 5-6 жолаушы болған. Олар автобустан өздері шығып үлгерген.

Өрт бөлімшесінің қызметкерлері келгенге дейін автобус жүргізушісі мен жолшыбай келе жатқан көлік жүргізушілері өрт сөндіргішпен жалынды сөндіруге тырысты. Өрт сөндірушілер келген сәтте олар өртті ауыздықтап үлгерді.

Өртті сөндіруге қарауыл кезекшісі мен ӨБ-46 9 адамы, 1 автоцистерна қатысты.