Семейдегі кәсіпорын 125 жұмысшыға заңсыз айыппұл салып тастаған – прокуратура

СЕМЕЙ. KAZINFORM – Семей қаласында кәсіпорындардың бірінде жұмыс беруші жұмысшыларға заңсыз айыппұл салған.

Семей қалалық прокуратурасының мәліметіне сүйенсек, кәсіпорындардың біріндегі жұмыс беруші жұмысшыларға еңбек тәртібін бұзды деген желеумен айыппұл салып тастаған. Бұл ҚР Еңбек кодексінің талаптарына қайшы.

- Заңға сәйкес, еңбек тәртібін бұзған адамды жауапкершілікке тартқанда айыппұл салу құқығы жоқ. Демек, басшы мұндай тәртіптік жаза қолдана алмайды. Прокуратураның араласуынан кейін кәсіпорындағы жұмыс берушінің заңсыз бұйрығының күші жойылды. Бұл кәсіпорынның 125 қызметкерінің конституциялық құқығын қорғауға мүмкіндік берді, - делінген ақпаратта.

Осы ретте, прокуратура барлық жұмыс берушіге айыппұл салу жазасын қолдану тек әкімшілік құқық бұзушылық туралы заңнама аясында жүргізілетінін ескертті.

Еске салсақ, бұған дейін ШҚО әкімдігі 160 млн теңгеге қызметтік көліктер не үшін керектігін түсіндіргені хабарланған.