Сенат Кеден одағының комиссиясы туралы шартқа өзгерістер енгізген хаттаманы қабылдады
ТАНА. 20 қазан. ҚазАқпарат /Қанат Мәметқазыұлы/ - Бүгін ҚР Парламенті Сенатының жалпы отырысында «2007 жылғы 6 қазандағы Кеден одағының комиссиясы туралы шартқа өзгерістер мен толықтырулар енгізу туралы хаттаманы ратификациялау туралы» ҚР заңы қабылданды.
Кеден одағының комиссиясы туралы шартқа өзгерістер мен толықтырулар енгізу туралы хаттамаға 2010 жылғы 9 желтоқсанда Мәскеу қаласында қол қойылған.
Бұл ретте құжат Кеден одағы комиссиясының тиімділігін арттыруға бағытталады және құжат 4 баптан тұрады. Оған сәйкес хаттама мен Кеден одағы комиссиясы шешімдерінің күшіне ену мерзімі нақтыланады. Сондай-ақ, комиссияға жекелеген мәселелер бойынша Кеден одағына мүше мемлекеттердің ұсыныстарын қарау мен ұстанымдарын келісу үшін үйлестіру және консультативтік органдар құру құқығы беріледі.
Парламент қабылдаған заң Мемлекет басшысының қол қоюына жіберіледі.
