Сенат төрағасының орынбасары Солтүстік Қазақстан облысында Елбасы Жолдауын түсіндіру жұмыстары бойынша бірқатар кездесулер өткізді
АСТАНА. 6 ақпан. ҚазАқпарат /Қанат Мәметқазыұлы/ - Парламент Сенаты төрағасының орынбасары Александр Судьин Солтүстік Қазақстан облысына барған сапары барысында Мемлекет басшысының «Әлеуметтік-экономикалық жаңғырту - Қазақстан дамуының басты бағыты» халыққа Жолдауын түсіндіру жұмыстары бойынша жергілікті активпен және жұртшылықпен бірқатар кездесулер өткізді.
Бұл туралы Сенаттың баспасөз қызметінен хабарланды.
Кездесуге қатысқан Айыртау және Аққайың аудандарының активі, ҰҚК мен қаржы полициясының жеке құрамы, М.Қозыбаев атындағы Солтүстік Қазақстан мемлекеттік университетінің, гуманитарлық-экономикалық колледждің студенттері мен ұстаздары алдында сөз алған төраға орынбасары А. Судьин биылғы стратегиялық құжатта белгіленген әлеуметтік-экономикалық жаңғыртудың ауқымды міндеттеріне тоқталды.
Кездесуге сондай-ақ Парламент Сенатының депутаттары Анатолий Башмаков, Самат Ескендіров қатысып, сөз сөйледі. Сенаторлар қатысқан облыс активінің жиналысында Мемлекет басшысының биылғы Жолдауда айқындалған даму міндеттерін іске асыру мәселелері талқыланды. Атап айтқанда, аймақтық даму мәселелері, индустриялық-инновациялық бағдарламаны, агроөнеркәсіп кешенін, кәсіпкерлікті жан-жақты қолдауды жүзеге асырудағы жергілікті биліктің рөліне назар аударылды.
