«Сергек» жол-көлік оқиғаларын 16% төмендетті
АСТАНА. ҚазАқпарат - Елордада «Сергек» жүйесін пайдалану арқылы жол-көлік оқиғалары 16 пайызға төмендетілді. Бұл туралы бүгін Мәжілістегі «Цифрлық Қазақстан» мемлекеттік бағдарламасына арналған Үкімет сағатында ҚР Ақпарат және коммуникациялар министрі Дәурен Абаев айтты, деп хабарлайды ҚазАқпарат тілшісі.
«McKinsey сарапшылары 2020 жылы әлемдегі смарт қалалардың саны 600-ге жетеді деген болжам жасады. Ал тағы 5 жыл өткенде ол шаһарларда Ішкі жалпы өнімнің 60 пайызы өндіріледі. Кейбір елдердің халықаралық тәжіребиесіне сүйене отырып, біз өзіміздің ақылды қалалар құрудың тұжырымдамасын жасадық. Бұл бойынша 5 негізгі бағыт белгіленді: Білім, денсаулық сақтау, қауіпсіздік, көлік және тұрғын-үй коммуналдық шаруашылық», - деді ол.
Министрдің айтуынша, қазіргі күні еліміздің барлық облыстарының және Астана, Алматы мен Шымкент қалаларының әкімдіктері осы салалар бойынша жобаларды жүзеге асырып жатыр.
«Мысалы, Астанада «Сергек» жүйесін пайдалану арқылы жол-көлік оқиғалары 16 пайызға төмендетілді. Тұрғын-үй коммуналдық шаруашылық саласы бойынша Алматыда қала көшелерін ақылды жарықтандыру жүйесі электр қуатын 40 пайызға үнемдеген. Еліміздің барлық аймағында мектепке дейінгі білім беру мекемелерінде баланы қабылдау үрдісі автоматтандырылған», - деді Дәурен Абаев.
