Шахтерлер кәсіподағы мен «АрселорМиттал Теміртау» әкімшілігі жалақыны индексациялау туралы келісімге қол қойды
Келісім комиссиясының кешегі отырысы құжатқа қол қоюмен аяқталды, деп хабарлады ҚазАқпаратқа «Қорғау» шахтерлер кәсіподағының төрағасы Марат Мирғаязов.
Оның айтуынша, компанияның көмір кәсіпорындары жұмысшыларына индексация, металлургтерге жасалғандай түрде жүзеге асырылады. 2009 жылғы қазан айының 1-інен бастап тарифтік ставкалар мен айлықтар 7,5 пайызға көтеріледі. Оған қоса екі бөліп: ағымдағы жылдың желтоқсан айының соңына дейін және келесі жылы қаңтар айында 45 500 теңге көлемінде төлем жасалатын болды..
«Сонымен қатар, біз барлық көмір кәсіпорындарында сыйақы туралы ережені өзгерту туралы келісім жасастық Бұл мәселені біз екіжақты комиссияда талқылайтын боламыз және төлем қаңтар айынан бастап жаңа тәсім бойынша жасалады деп ойлаймын», деді М.Мирғаязов.
Шахтерлер кәсіподағы сот органдарына берген шағым-арыздарын қайтарып алатын болды. Дегенмен кәсіподақ жетекшілері келесі жылдың басында өткен 2009 жылдың жалақысын индексациялау мәселесін көтермек. «Ақпан айында біз келіссөзді бастаймыз», деді М.Мирғаязов.