Шайбалы хоккей: Бүгін Қазақстан құрамасы Жапониямен ойнайды
АСТАНА. Ақпанның 12-сі. ҚазАқпарат /Ернұр Ақанбай/ - Шайбалы хоккейден «Нагано кубогы-2010» халықаралық турниріне қатысып жатқан Қазақстан құрамасы бүгін айдын иелері - Жапониямен ойнайды,
деп хабарлайды ҚазАқпарат.
Айта кетейік, Наганода біздің команда Дания, Словения және Жапония құрамаларымен бір топта өнер көрсетуде. Аталмыш турнир аясындағы бірінші матчын кеше Даниямен өткізген жерлестеріміз, 2:1 есебімен жеңіске жетті. Жеңіс шайбаларының авторлары - Вадим Краснослободцев пен Алексей Коледаев.
Қазақстан құрамасы үшін «Нагано кубогы-2010» турниріне қатысу ағымдағы жылдың мамыр айында Германияда өтетін жоғары дивизиондағы командалар арасындағы әлем чемпионатына дайындық сатысы болып табылады. Құраманың бас бапкері Андрей Шаяновтың айтуынша, команданың басты міндеті - Нагано кубогын жеңіп алу. Ал, стратегиялық мақсат - құрама ойыншыларының басын қосып, олардың әлем чемпионаты алдындағы дайындығын пысықтау.
Турнир ақпанның 13-і күні аяқталады.
