Шайбалы хоккей: Қазақстан құрамасы қысқы олимпиаданың іріктеу турнирі аясындағы алғашқы ойынында жеңіліп қалды
АСТАНА. Ақпанның 6-сы. ҚазАқпарат /Ернұр Ақанбай/ - Шайбалы хоккейден Қазақстан ұлттық құрамасы 2010 жылғы қысқы олимпиада ойындарының іріктеу турнирі аясында алғашқы матчын кеше Норвегиямен өткізіп, 1:2 есебімен жеңіліп қалды.
Бұл туралы ҚазАқпарат Астананың «Барыс» хоккей клубының сайтына сілтеме жасап хабарлайды. Іріктеу турнирі Норвегияның Осло қаласында өтуде. Енді біздің команда келесі кездесулерін ақпанның 7-інде Даниямен, ал ақпанның 8-інде Франциямен өткізеді. Атап өтерлігі, тек топ жеңімпазы ғана 2010 жылы Канаданың Ванкувер қаласында өтетін қысқы олимпиада ойындарының жолдамасына ие болады.
