Шекара бойындағы түлектердің көршілес елдің оқу орындарына әуестігі азаймай тұр

Өңірлік білім беру басқармасының дерегінше, биылғы оқу жылында облыста 362 жалпы білім беретін мектеп жұмыс істеп тұр. Оларда жалпы саны 115,9 мың оқушы білім алып жатыр.

— 11-сыныптарды 5 482 түлек тәмамдаса, олардың ішінде 1589 түлек ауылдық жерлерде. Негізгі ҰБТ-ға 4934 түлек, яғни мектеп бітірушілердің 90%-ы қатысуда. Тестілеу 10 мамыр мен 10 шілде аралығында электрондық форматта екі тестілеу орталығында өтіп жатыр. Қаңтар мен наурыз айларындағы ҰБТ-ға түлектердің шамамен 90%-ы қатысты. Ең жоғары нәтиже — 137 балл екі түлекке тиесілі. Олардың бірі Ақсу қаласы Қызылжар ауылындағы орта мектепті, екіншісі Павлодар қаласындағы А. Байтұрсынұлы атындағы мектепті бітіргелі отыр, — деп хабарлады Kazinform тілшісіне өңірлік білім беру басқармасы басшысының орынбасары Нұргүл Азанбаева.

Облыста өзге елдің оқу орындарын таңдайтын түлектердің саны азаймай тұрғаны байқалады. Жыл сайын түлектердің шамамен 90%-ы еліміздің оқу орындарына түседі. Соңғы 5 жылда облыс мектептерін шамамен 22 мың түлек бітірсе, олардың 19,7 мыңы Қазақстанның жоғары оқу орындары мен колледждерінде білімін жалғастырған. Былтыр облыс мектептерін 5 048 түлек бітірсе, олардың 12 пайызы, яғни 600-і жақын және алыс шетелдің жоғары оқу орындары мен колледждеріне түскен. Соның ішінде шекара бойындағы Железин, Успен, Шарбақты, Тереңкөл аудандарының түлектердің дені ресейлік ЖОО-ларды таңдайтыны байқалады. Мамандар мұндай тенденция азаймай тұрғанын айтады.

Атап өтерлігі, 2025 жылы түлектердің шамамен 42%-ы IT, инженерия, автоматтандыру және цифрлық технологиялар бағыттарын таңдаған. Жастардың аталған салаларға қызығушылығының өсу үрдісі байқалады.

Бұған дейін Қазақстанда мектеп түлектері соңғы қоңырауға қанша теңге жұмсайтын жазғанбыз.