Шекарадан 2,8 млрд теңгеден аса шетел валютасын алып өтпек болғандар жауапқа тартылды
АСТАНА. KAZINFORM — ҰҚК Шекара қызметі 2025 жылғы наурыз айындағы іс-қимыл нәтижелері туралы қорытындыны жария етті.
ҰҚК Шекара қызметі Мемлекеттік шекараны күзету мен қорғауды қамтамасыз ету аясында 2025 жылғы наурызда құзырлы органдармен өзара әрекеттесе отырып, шекара кеңістігінде ҚР заңнамасын бұзған 3 429 адам, оның ішінде 2 995 шетелдік азамат жауапқа тартылды.
— Мемлекеттік шекара арқылы заңсыз өтудің 1 248 фактісінің алдын алынды, оның ішінде: 27 факті — есірткі заттары, оның ішінде көлемі — 750 литр прекурсорлар; 76 факті — қарулар мен оқ-дәрілер; 656 факті — жалпы сомасы 14,5 млн теңгеден асатын жанар-жағармай материалдары (54 000 литрден астам); 731 факті — жалпы сомасы 3,1 млрд теңгеден асатын халық тұтынатын тауарлар; 157 факті — жалпы сомасы 2,8 млрд теңгеден астам шетел валютасы, — делінген ведомство хабарламасында.
Каспий жағалауындағы аймақта экологиялық қауіпсіздікті қамтамасыз ету мақсатында көрсетілген кезеңде су айдынында браконьерліктің 20 фактісінің жолы кесілді.
— Табиғи мекендеу ортасына Қызыл кітапқа енгізілген бекіре тұқымдас балықтардың 89 данасы (508 кг) және 7 бас каспий итбалығы жіберілді. Заңсыз балық аулау құралдары тәркіленді. Оның ішінде: 10 жүзу құралы; 22,9 км торды құрайтын браконьерлік аулау құралдары. Алдын алынған залалдың сомасы 205 млн теңгені құрайды, — деп түйіндеді ҰҚК баспасөз қызметі.
Бұл фактілер бойынша материалдар бұзушыларды жауапкершілікке тарту үшін құқық қорғау және сот органдарына жіберілді.
Осыдан бұрын жыл басынан ҰҚК полиция және прокуратура органдарымен бірлесіп 12 автомат, 41 тапанша, 75 мылтық, 36 граната және әртүрлі калибрдегі 1 603 оқ-дәрі тәркілегені хабарланды.
