Шығыс Қазақстанда ішімдіктен бас тартқан ауыл саны 22-ге жетті

ӨСКЕМЕН. KAZINFORM — Шығыс Қазақстан облысында 22 ауылдың тұрғындары ішімдіктен бас тартты. 

Зайсан ауданы Біржан ауылдық округіне қарасты Қуаныш ауылының тұрғындары «Ішімдіксіз ауыл» республикалық бастамасына қосылу туралы шешім қабылдады. Аталған шешім елді мекен тұрғындарының жалпы жиналысында бірауыздан қабылданды.

— Бұл — ауданда ресми түрде тіркелген үшінші «салауатты ауыл». Осы бастама құқық бұзушылықтардың, оның ішінде тұрмыстық зорлық-зомбылықтың алдын алуға және қоғамдық тәртіпті нығайтуға бағытталған. Қазіргі уақытта Қуаныш ауылында 80-нен астам үйде шамамен 370 адам тұрады. Қабылданған шешім жастар арасында салауатты өмір салтының қалыптасуына ықпал етпек, — деп хабарлады ШҚО полиция департаментінен. 

Осылайша, Қуаныш ауылы Шығыс Қазақстан облысы бойынша ресми түрде ішімдіктен бас тартқан 22-ші елді мекен болып отыр.

Еске салсақ, осыған дейін Павлодарда ішімдік ішкен әкесі үш жасар қызын өлтіріп қойғаны хабарланған.