Шығыс Қазақстандағы барлық қала, аудан бүгін жұмысты сағат 8-ден бастады

ӨСКЕМЕН. KAZINFORM – Шығыс Қазақстан облысы толықтай жаңа жұмыс кестесіне ауысты.

Бүгіннен бастап өңірдегі мемлекеттік мекемелер, бюджеттік ұйымдар, кәсіпорындар және әлеуметтік қызметтер түгелдей жұмыс уақытын сағат 08:00-ден бастады. Кешке жұмыс сағат 17:30-да дейін созылады. Ал түскі үзіліс 12:00-ден 13:30-ға дейін белгіленген. Бұл жаңашылдық күндізгі жарықты тиімді пайдалану мен еңбек өнімділігін арттыруға бағытталған.

- 2024 жылы Қазақстанда біртұтас UTC+5 уақыт белдеуіне көшу бастамасы қызу талқыланды. Бұл ұсыныс әсіресе Шығыс Қазақстан облысы мен Алматы қаласында қызу талқыланды. Өңір тұрғындары бұл мәселе бойынша өз пікірлерін білдірді. Нәтижесінде, Үкімет халықтың пікірін ескере отырып, әр өңірге жұмыс кестесін жергілікті ерекшеліктерге қарай реттеуге мүмкіндік беру туралы шешім қабылдады. Мұндай тәсіл әр аймақтың қажеттіліктерін ескеруге және шешімді неғұрлым икемді әрі ыңғайлы етуге мүмкіндік берді, - деп хабарлады облыс әкімдігінен.

Шығыс Қазақстандағы жаға жұмыс кестесіне көшу кезеңдері келесідей өрбіді:

• Катонқарағай ауданы 2025 жылдың қаңтар айының басында осы өзгерістерді бірінші болып енгізді.

• Марқакөл және Үлкен Нарын аудандары 24 ақпанда бастаманы қолдады.

• Зайсан, Күршім, Тарбағатай және Самар аудандары 5 наурыздан бастап жаңа кестеге көшті.

• Алтай және Ұлан аудандары 12 наурызда өзгерістерді енгізді.

• Глубокое және Шемонаиха аудандары 13 наурызда жұмыс уақытын бір сағатқа шегерді.

• Риддер қаласы 14 наурыздан бастап жаңа кестеге көшті.

• Өскемен 20 наурыздан осы жаңашылдыққа бет бұрды.

Жаңа жұмыс кестесін енгізу алдында әр қала, ауданда халықпен кездесулер өткен. Көпшілік жұмыс күнінің ерте басталуын қолдады.

Айта кету керек, мектептер, балабақшалар және медициналық мекемелердің жұмыс кестесі өзгерген жоқ. Себебі олар бұған дейін де осыған ұқсас тәртіппен жұмыс істеген.

Еске салсақ, бұған дейін Өскеменде жұмыс уақыты 1 сағатқа шегерілгенін хабарлаған едік.