Шикі мұнайды шетелге заңсыз шығарғандар құрықталды - Қаржы полициясы
АСТАНА. Шілденің 15-і. ҚазАқпарат /Руслан Ғаббасов/ - Мұнай мен мұнай өнімдерін контрабандалық жолмен сыртқа шығару мемлекетке миллиондаған теңге залал келтіруде.
Бұл туралы бүгін Астанада өткен апталық брифингте ҚР Экономикалық қылмысқа және сыбайлас жемқорлыққа қарсы күрес агенттігінің ресми өкілі Мұрат Жұманбай мәлім етті, деп хабарлайды ҚазАқпарат.
«Ақтөбе облысында «КНПЗ-Трейд» және «Вернай Ойл Казахстан» ЖШС-нің директоры мен аталмыш кәсіпорындардың басқа да басшыларынан құралған топтың қылмыстық іс-әрекеті әшкереленді. Олар «композит» деп рәсімдеу арқылы жалпы кедендік құны 901 млн.теңгенің шикі мұнайын шетелге заңсыз шығарған», деді ресми өкіл.
Оның айтуынша, қылмысты ұйымдастырушыға 5 млрд. 516 млн.теңге кедендік төлемдер мен алымдарды төлеуден жалтарды деген айып тағылды.
«Топтың 3 қатысушысы сотқа тапсырылды, ал ұйымдастырушыға іздеу жарияланды», деді М. Жұманбай.
