Шымкентте қоғамдық орындарды ластаған 1600-ден аса тұрғын жауапқа тартылды
ШЫМКЕНТ. KAZINFORM — Ортақ пайдаланатын орындарды ластау айыппұл төлеуге алып келеді.
Жалпыға ортақ пайдаланылатын орындардың ластануына байланысты құқық бұзушылықтарды болдырмау мақсатында тұрақты түрде профилактикалық іс-шара жүргізіліп келеді. Жыл басынан бері Шымкентте аталған құқық бұзушылықтарды жасағаны үшін 1638 адам әкімшілік жауапкершілікке тартылды. Тәртіп сақшылары белгіленбеген жерлерде қоқыс тастау жайттарын жедел басқару орталығының камераларының көмегімен де анықтаған.
— Ортақ пайдаланылатын орындарды, саябақтарды, скверлердi ластау, оның iшiнде белгiленбеген орындарға коммуналдық қалдықтарды тастау заңнамаға сәйкес айыппұл салуға алып келеді. Қаланың тазалығы — әдемі көрініс ғана емес, сонымен қатар біздің денсаулығымыздың кепілі. Осыған байланысты полиция мегаполис тұрғындарын қоршаған ортаға ұқыпты қарауға шақырады, — делінген Шымкент қаласы полиция департаментінің баспасөз қызметі ұсынған ақпаратта.
Айта кетейік, бұдан бұрын мерекеде әйелдерді сыйлықсыз қалдырған шымкенттік екі жігіт қамауға алынғанын жазған болатынбыз.
