Шымкенттегі «Қиял әлемі» саябағында заңсыз салынған ғимараттарды бұзу басталды
ШЫМКЕНТ. KAZINFORM - Жер ресурстары департаментінің арызы қанағаттандырылды, шешім заңды күшіне енді.
Мамандандырылған экономикалық соттың шешімі бойынша заңсыз салынған ғимараттарды бұзу жұмыстары ауыр техниканың көмегімен жүргізіліп жатыр.
Республика даңғылы 9 мекенжайындағы учаске бастапқыда жасыл желек егетін аймақ ретінде белгіленген болатын. Алайда 2011 жылдан бастап 4 гектар жер жалға берілгеннен кейін, уәде етілген балалар орталығының орнына коммерциялық аттракциондар паркі пайда болды.
Әкімдік мәліметінше, жалға алушы шарт талаптарын бұзған.
— Сот орындаушылары меншік иелерін тоғыз іргелі құрылысты өз қаражатына бұзу қажеттігі туралы хабардар еткен. Бұл талап орындалмағандықтан сот міндетті түрде ғимараттарды бұзып, жерді бастапқы күйінде мемлекет меншігіне қайтару туралы шешім қабылдады, - деп хабарлады қалалық әкімдіктің баспасөз қызметі.
Ғимараттар бұзылып жатқан кезде кейбір жалға алушылар мен кәсіп иелері жұмысқа кедергі жасамақ болып, өздерінің жұмыс орындарын жоғалтамыз деп шу көтерді. Дегенмен, қарсылықтарға қарамастан, бұзу жұмыстары басталды.
Айта кетейік, бұдан бұрын Шымкенттегі Конгресс-холл кешеніне «Қызғалдақ» деген атау берілгенін жазған болатынбыз.
