ШҚО-да «Бірқабатты Шығыс» бағдарламасы аясында 300-ден астам үй салынады
ШҚО әкімдігінің мәліметіне сүйенсек, өңірде «Бірқабатты Шығыс» бағдарламасы өз жалғасын табуда. Биыл соның аясында облыс аумағында 316 үй салынбақ. Оның ішінде 71-і құрылысы былтыр басталған үйлер. 152 жер үй қалаларда бой көтереді.
«Осы бағдарлама бойынша көпбалалы отбасыларға және әлеуметтік тұрғыда осал санатындағыларға, оның ішінде жетім балалар мен ата-анасының қамқорлығынсыз қалған балаларға үй беріледі. Аудандарға қатысты айтар болсақ, Зайсан ауданында – 25 үй, Күршім ауданында – 14, Глубокое ауданында – 7, Ұлан ауданында – 11, Тарбағатай ауданында – 9, Шемонаиха ауданында – 2, Самар ауданында – 3. Үйлердің сапасына, әдемі безендірілуіне ерекше назар аудару қажет», - деді облыс әкімі Даниал Ахметов.
Оның айтуынша, қала, аудан әкімдері мемлекеттік архитектуралық-құрылыс бақылау басқармасының қызметкерлері қол қоймай тұрып, үйлерді пайдалануға қабылдамауы тиіс.
«Дәрігерлер мен мұғалімдерге де «Бірқабатты Шығыс» бағдарламасы бойынша тұрғын үй беріледі. Президент Қасым-Жомарт Тоқаевтың «Ауылдық денсаулық сақтауды жаңғырту» жөніндегі тапсырмасына сәйкес, облыс аумағында 36 жаңа медициналық мекеме бой көтеретін ауылдарда үйлер саламыз. Сондай-ақ елді мекендерді интернетпен қамтамасыз ету мәселесін шешуді жалғастырып жатырмыз. 2023 жылы 73 елді мекенге интернет тартылады», - деді аймақ басшысы.