ШҚО-да отқа оранған жер үйден 29 жастағы әйелдің денесі табылды

ӨСКЕМЕН. KAZINFORM – Шығыс Қазақстан облысы Глубокое ауданында жер үйде өрт шығып, 1 адам көз жұмды.

Облыстық Төтенше жағдайлар департаменті баспасөз қызметінің мәліметіне сүйенсек, оқиға Глубокое ауданы Заречный ауылында болған.

- Құтқарушыларға жер үйде өрт шыққаны жайлы хабар түсті. Олар сол жерге шұғыл келіп жетті. Сол кезде өрт үйдің едәуір бөлігін шарпып жатты. Барлау кезінде бөлмелердің бірінен әйелдің мәйіті табылды. Марқұм 29 жаста болған, - делінген ақпаратта.

Өрт сөндірушілер келгенше куәгерлер үйден ес-түссіз жатқан ер адамды сыртқа алып шыққан. 40 жастағы азамат аурухананың жансақтау бөліміне жатқызылды.

Алдын ала дерек бойынша қызыл жалынның шығу себебі – пеш жағу кезінде өрт қауіпсіздігі ережелерін сақтамау.

Еске салсақ, бұған дейін жыл басынан бері Алматыда 5 қойма өртенгені хабарланған.