ШҚО-да шенеуніктер конкурс өткізбей, 1,4 млрд теңгеге бір көзден заңсыз келісімдер жасаған

ӨСКЕМЕН. KAZINFORM — ШҚО прокуратура органдары төтенше жағдай салдарын оқшаулау және жою үшін мемлекеттік сатып алу шарттарын жасасу заңдылығын тексерді. 

Талдау нәтижесінде 1,4 млрд теңге сомасына заңсыз жасалған 78 келісімшарт анықталды.

Осы шарттарды жасау кезеңінде төтенше жағдай жарияланбағаны, тиісінше, бір көзден шарт жасасуға негіз болмағаны анықталды.

Атап айтқанда, ЖАО қар шығару, әкімшілік ғимараттарды ағымдағы жөндеу, мұздан тазартатын реагенттер және басқа тауарларды, жұмыстарды және қызметтерді сатып алды.

Қолданыстағы заңнамада көзделмеген жағдайларда тікелей шарт жасасу арқылы бір көзден алу тәсілімен мемлекеттік сатып алуды жүзеге асырғаны үшін лауазымды адамдар әкімшілік жауапкершілікке тартылады.

Бүгінгі күнге дейін шенеуніктер 14 млн теңге көлемінде айыппұл төледі.