ШҚО-да заңсыз жұмыс істеп жүрген 12 Қытай азаматы елден шығарылды

ӨСКЕМЕН. KAZINFORM – Шығыс Қазақстан облысы Күршім ауданында заңсыз жұмыс істеп жүрген 12 Қытай азаматы анықталды. Сот шешімімен олар елден шығарылды.

ШҚО соты баспасөз қызметінің мәліметіне сүйенсек, Күршім аудандық сотында ҚХР азаматтарына қатысты ҚР ӘҚБтК-нің 517-бабы 5-бөлігімен әкімшілік іс қаралды. 

Белгілі болғандай, олар жұмысқа тұрғанда тиісті рұқсат қағаздарын алмай, көші-қон саласындағы заңнама талаптарын бұзған. Сот барысында олар өз кінәларын толықтай мойындады. 

«Сот шешімімен 12 Қытай азаматы кінәлі деп танылып, Қазақстан Республикасы аумағынан шығарылып жіберілді. Қаулы толықтай заңды күшіне енді», - делінген ақпаратта. 

Еске салсақ, осыған дейін Өскеменде жүргізуші куәлігіне емтихан тапсырғандардан 40 млн теңге сыйақы алған ХҚО қызметкерлері сотталғаны хабарланған.