ШҚО-да жол апатынан 3 адам қаза болды
ӨСКЕМЕН. KAZINFORM - Шығыс Қазақстан облысы Шемонаиха ауданы Первомайка кентінде жол апатынан үш адам көз жұмды.
Оқиға 6 мамырда түнде болды. ШҚО Полиция департаментінің мәліметінше, ВАЗ-21100 маркалы көлік жолдан шығып кетіп, ағашқа соғылған.
— Жол-көлік оқиғасы салдарынан жүргізуші мен екі жолаушы сол жерде көз жұмды. Алдын ала ақпарат бойынша, жүргізуші көлік тізгініне ие бола алмай қалған, — делінген ақпаратта.
Аталған факті бойынша тергеу амалдары басталды. Қазір тергеушілер оқиғаның барлық мән-жайын анықтап жатыр.
Бұл қайғылы жағдай шағын кент үшін ауыр соққы болды. Жергілікті әкімдік өкілдері қаза болғандардың отбасына көңіл айтты.
— Марқұмдардың туғандары мен жақындарына қайғыларына ортақтасып, көңіл айтамыз. Бекем болыңыздар, — делінген хабарламада.
Еске салсақ, бұған дейін Атырауда көлік қағып кеткен 8 жастағы оқушы оқиға орнында көз жұмғаны хабарланған.
