ШҚО-дағы екі республикалық жолда қараша айынан бері енгізілген шектеу алынып тасталды
ӨСКЕМЕН. KAZINFORM – Шығыс Қазақстан облысындағы екі республикалық жолдағы көлік қозғалысына салынған шектеу алынды.
ШҚО Полиция департаменті баспасөз қызметінің мәліметіне сүйенсек, өңір аумағындағы екі жолда ауа райы жағдайына байланысты 2024 жылдың 1 қарашасынан бері тіркемелі және жартылай тіркемелері бар көліктердің қозғалысына шектеу қойылған болатын.
Атап айтқанда, республикалық маңызы бар Өскемен-Алтай-Үлкен Нарын-Катонқарағай-Рахман қайнарлары тасжолының 46-66 шақырымы (Осинов асуы) және Өскемен-Риддер-РФ шекарасы тасжолының 94-104 шақырымы (Бутаково ауылы мен Риддер қаласының аралығы).
- 31 наурыздан бастап шектеу алынып тасталды. Енді тіркемелі және жартылай тіркемелері бар көліктердің қозғалысына рұқсат етілген, - делінген ақпаратта.
Еске салсақ, бұған дейін Орал қаласында Бисен Жұмағалиев көшесіндегі жолдың нашарлығына байланысты әлеуметтік желіде бейнежазба тарағаны жайлы жазғанбыз.
