Щучинскіде кафеде газ қоспасының жарылуынан алты адам қаза тапты
АСТАНА. KAZINFORM – Ақмола облысы Бурабай ауданының Щучинск қаласында бес қабатты тұрғын үйге жапсарлас орналасқан бір қабатты кафеде газ-ауа қоспасы жарылып, артынша өрт шықты. Оқиға салдарынан алты адам көз жұмды.
Ақмола облысы Төтенше жағдайлар департаменті баспасөз қызметінің мәліметінше, хабар түскеннен кейін бес минут ішінде өңірдің құтқару күштері мен құралдары оқиға орнына жеткен.
«Өрт сөндірушілер жанып жатқан ғимараттан 8 газ баллонын алып шығып, 10-нан астам адамды құтқарды. Алдын ала деректер бойынша, оқиға салдарынан шамамен 20 адам зардап шекті, алты адам қаза тапты», – деді Ақмола облысы ТЖД ресми өкілі Ерсайын Қойшыбаев.
Қазіргі уақытта өрт толық сөндірілген. Құтқарушылар үйінділерді аршу жұмыстарын жүргізіп жатыр. Оқиғаның себептері мен мән-жайы анықталуда.
«Ақмола облысы ТЖД-да 8 (7162) 514-298 нөмірі бойынша жедел желі ашылды. Оқиға орнында ТЖД басшылығы, облыс әкімінің орынбасары, өрт сөндіру бөлімшелері, құтқару топтары, медициналық қызмет пен полиция, газ-техникалық инспекция жұмыс істеуде. Санавиация мен ТЖМ реанимобильдері дайындыққа келтірілді», – деп қосты ведомстводан.
Бұған дейін Астанада екі қабатты ғимарат өртенгені хабарланған еді.
