ШҰҒЫЛ: Ақмола облысындағы жол апатынан қаза тапқандардың 16-шысы Қарағанды тұрғыны
АСТАНА. 20 тамыз. ҚазАқпарат - ҚазАқпарат тілшісіне Ақмола облыстық ІІД-нің жол полициясы басқармасының баспасөз қызметінен хабарлағандай, бүгінгі күннің аяғына қарай Ақмола облысындағы ірі жол апатынан қаза тапқандардың тізімі толықты.
Аршалы орталық аудандық ауруханасында Қарағанды қаласының тұрғыны, 01.01.1950 жылы дүниеге келген Житников Сергей Анатольевич 16-шы болып көз жұмды.
Сондай-ақ баспасөз қызметінен қазіргі кезде 13 адамның мүрдесінің аты-жөні анықталғанын, алайда қаза тапқандардың тізімі бүгінде жариялануға жатпайтынын хабарлады.
Апат салдарынан қаза болған басқа адамдардың аты-жөндерін анықтау жұмыстары жүргізілуде.
Бұрын хабарланғандай, ағымдағы жылдың 19 тамызында сағат шамамен 20:50-де Алматы-Екатеринбор тас жолының 1309-шы шақырымында ірі жол-көлік апаты орын алды. Соның салдарынан 14 адам оқиға орнында көз жұмып, 20-дан астамы жарақаттар алды. Тағы екі адам кейіннен қайтыс болды.
