Швейцария Еуропада ең көп кітап оқитын ел деп танылды

АСТАНА. KAZINFORM — Германияда әлемдегі ең ірі әрі беделді баспа индустриясы оқиғаларының бірі — 77-ші Франкфурт кітап жәрмеңкесі ашылды. Биылғы шараның құрметті қонағы — филиппиндер болды, деп хабарлайды АЗЕРТАДЖ.

Еуропа баспагерлер федерациясы (FEP) Еуропа кітап нарығының жай-күйіне жан-жақты талдау ұсынды.

Нәтижелер біркелкі емес: номиналды айналым 25 миллиард еуроға жетіп, 2007 жылғы ең жоғары деңгейіне қайта оралғанымен, бұл шынайы жағдайды толық көрсетпейді. 2021 жылдан кейін нарықтағы құлдырау үдей түскен.

Кітап бағасы жалпы инфляциямен салыстырғанда баяу өсіп жатыр. Нарықта қағаз кітаптар басым (80 пайыздан астам). Дегенмен, ең қарқынды дамып жатқан сегмент — аудиокітаптар (4 жыл ішінде +70 пайызға жуық өскен). Нарықтағы тұрақтылықтың оң белгісі ретінде балалар әдебиеті атап өтуге болады — оның үлесі 14–15 пайыз көлемінде тұрақты сақталып отыр. Пандемия кезінде онлайн сату күрт артқанымен, FEP қазіргі уақытта оң өзгерісті атап өтеді: сатып алушылар біртіндеп дәстүрлі офлайн дүкендерге қайта орала бастаған.

Жалпы оқырмандар саны азайып келе жатқаны байқалады, бірақ 16–29 жас аралығындағы жастар — ең белсенді оқырмандар саналады. Бұл болашаққа сеніммен қарауға мүмкіндік береді.

Әйелдер, сондай-ақ жоғары білімді және табысы жоғары адамдар көбірек кітап оқитын көрінеді.

FEP дерегінше, Швейцария Еуропада ең көп кітап оқитын ел деп танылды, ал Испанияда кітап нарығы 12 жыл қатарынан өсіп келеді. Францияда қолданылған (екінші рет сатылатын) кітаптар нарығы жақсы дамып келеді — яғни, сатылып жатқан әр бесінші кітап бұрын бір рет қолданылған.

Бұдан бұрын елордада белгілі қаламгер Баянғали Әлімжановтың балаларға арналған «400 тәтті тақпақ» атты тақпақтар жинағының таныстырылымы өткенін жазғанбыз.