Сиыр еті картоп ретінде экспортталды деген ақпарат жалған — Айдарбек Сапаров

АСТАНА. KAZINFORM — Әлеуметтік желілерде экспортқа шектеу қойылғанына қарамастан, сиыр еті шетелге картоп ретінде шығарылады деген ақпарат тараған. ҚР Ауыл шаруашылығы министрі Айдарбек Сапаров бұл мәліметтің шындыққа сәйкес келмейтінін хабарлады.

Министрдің айтуынша, Ветеринариялық бақылау және қадағалау комитеті экспорттық ағындарды тұрақты түрде қадағалап отыр.

— Картоп тиелген вагондардан ет табылды деген нақты дерек тіркелген жоқ. Бұл — жалған ақпарат, — деді Айдарбек Сапаров Қазақстан Үкіметі отырысының қорытындысы бойынша өткен баспасөз конференциясында.

Оның сөзінше, картоп тасымалданатын вагондарға ет тиеу техникалық және санитарлық талаптарға сәйкес келмейді. Ет өнімдері арнайы температуралық режимді қажет етеді және теміржол арқылы тек арнайы суытқыш вагондармен жеткізіледі.

Сонымен қатар министр құжатсыз шекарадан өтпек болған жүк көлігінің анықталғанын мәлімдеді. Тексеру барысында тиісті құжаттар рәсімделіп, кінәлі тұлғаларға заңнамаға сәйкес әкімшілік шара қолданылған.

Айдарбек Сапаров заңсыз тасымалдың алдын алу бағытындағы бақылау жұмыстары күшейтілгенін және жалған ақпараттың таралуына жол берілмейтінін атап өтті.

Айта кетейік, бұған дейін елімізде шикізаттық емес экспорт үлесінің артқаны туралы жазған едік.