Сим-карталарды сатып алу кезінде биометриялық сәйкестендіру жасалады

АСТАНА. KAZINFORM — Елімізде сим-карталарды сатып алу кезінде биометриялық сәйкестендіру жүйесі енгізіліп жатыр.

Бұл туралы Үкімет отырысында ҚР цифрлық даму, инновациялар және аэроғарыш өнеркәсібі министрі Жаслан Мәдиев айтты.

— Жаңа сим-карталарды сатып алу кезінде биометриялық сәйкестендіру енгізіліп жатыр. Сим-карталарды үшінші тұлғаларға заңсыз беру және simbox-тарды заңсыз пайдалану жағдайларына қатысты жауапкершілік күшейтілуде, — деді министр Үкімет басшысының сауалына жауап бере отырып.

Спикер сондай-ақ алаяқтыққа қатысты заң нормаларының да күшейтіліп жатқанын атап өтті.

— Жеке деректерді қорғау талаптарын бұзғаны үшін заңнамалық талаптар күшейтілуде. Алаяқтардың әрекетін шектейтін бірқатар норма ұсынылды. Ол Парламент депутаттарының қарауында. Осы бағытта жұмыстар жалғасын табады, — деді ол.

Осыған дейін Қазақстанда бір қолға берілетін SIM-карта санын шектейтін заң әзірленіп жатқаны мәлім болды.