СҚО-да биыл 200 млн теңгеге тұрғындарға қымбат ота жасалған

ПЕТРОПАВЛ. KAZINFORM – Солтүстік Қазақстан облысының тұрғындарына биыл 30-дан астам жоғары технологиялық медициналық қызмет көрсетілді.

Әлеуметтік медициналық сақтандыру қоры облыстық филиалының мәліметінше, кеуде қолқасына протезді эндоваскулярлық имплантациялаудың құны 4 млн теңгеден асады. Науқастың қорға қанша қаражат аударғаны маңызды емес, ең бастысы сақтандырылған болуы тиіс.

– Жыл басынан бері өңір тұрғындарына жалпы сомасы 198,9 млн теңгенің 31 жоғары технологиялық медициналық қызметі көрсетілді. Оның ішінде 19 ота МӘМС есебінен, 12-сі тегін медициналық көмектің кепілдік берілген көлемі аясында жасалды. Мәселен көпбейінді облыстық аурухананың кардиоорталығында оталардың құны 650 мың теңгеден басталады, - дейді қордың облыстық филиал директорының орынбасары Талғатбек Тілеубердин. 

Маманның айтуынша, биылғы жарты жылда өңірде екі медициналық ұйым жоғары технологиялық медициналық қызмет көрсетті. 

– МӘМС аясында көпсалалы облыстық аурухана өңір тұрғындарына 18 жоғары технологиялық медициналық қызмет көрсетті. Бас және мойын тамырларын жабу бойынша 7 ота, кеуде қолқасына протезді іштен орнату бойынша 1 ота жасалып, жүрек соғуын автоматты түзейтін құрал 4 адамға орнатылса, миды қоректендіретін ішкі артерияларға стенд орнату бойынша 6 ота жасалды. Олардың жалпы құны 119 млн теңгеден асты. Көпсалалы қалалық аурухана 2 млн 130 мың теңгеге пациентке тізе буынын ауыстыру бойынша 1 ота жасады, - дейді Талғатбек Тілеубердин. 

Бұған дейін СҚО-да скринингіден өткен әр үшінші адамнан туберкулез инфекциясы анықталғанын жазған едік.