СҚО-да биыл жылыту маусымына дайындыққа 31 млрд теңге бөлінді
ПЕТРОПАВЛ. KAZINFORM – Солтүстік Қазақстан облысында қыркүйек айында жылыту маусымы басталады. Суықтың түсуіне бірер апта ғана қалғанымен, өңір тұрғындарының тек 41% ғана қажетті көмірді түсіріп алған.
СҚО-ның жылыту маусымына дайындық барысы өңірлік коммуникациялар қызметінде өткен брифингте пысықталды. Облыстық энергетика және тұрғын үй-коммуналдық шаруашылық басқармасының басшысы Данияр Қуанышбаевтың айтуынша, биыл жылыту маусымына дайындалу үшін 31 млрд теңге, соның ішінде республикалық бюджеттен 5,7 млрд теңге, облыстық бюджеттен 1 млрд теңге бөлінген. Ал 24 млрд теңге жеке инвестициялар.
«Петропавлдағы 2-Жылу-электр орталығында №1 қазандық агрегаты, №3,6 турбоагрегат күрделі жөнделіп және №1 түтін мұржасы салынып жатыр. Бұл мақсатқа жалпы 17,6 млрд теңге жоспарланды, соның 7,23 млрд теңгесі игерілді», - деді Данияр Қуанышбаев.
Маманның айтуынша, жұмыс кестеге сай атқарылып жатыр. Мәселен 2022 жылы құлаған түтін мұржасының орнына салынып жатқан жаңа мұржа қазір 30 метрге көтерілген.
«Ең қиын жұмыс артта қалды. Әлі де оқпаны 150 метрге дейін көтеріледі. Бұл жұмысты 15 қарашаға дейін аяқтауымыз қажет. Ал қалған жұмыстар келесі жылы аяқталады. Қалған екі мұржа техникалық тексерістен өтті. Биыл қысты былтырғыдай сол екеуімен өткіземіз», - деді Данияр Қуанышбаев.
СҚО-дағы жылу желілері шамамен 70% тозған. Биыл жөндеуге 6 млрд теңгеден астам қаражат бөлінді.
Петропавл қаласында 1170 көпқабатты тұрғын үй болса, қазір соның 84% ғана жылыту желісінде жуып-шаю жұмысын жүргізген. Жеке үй тұрғындары да қысқа дайындалуға асығар емес. Халықтың жылыту маусымында көмірге деген қажеттілігі – 399 мың тонна. Тұрғындар тек 146 мың тоннаны, яғни 41% ғана түсіріп алған.
«Көмір бағасы маркасына байланысты 12-21 мың теңге аралығында. Қатты отын кестеге сай жеткізіліп жатыр, қазір тұйықтарда 34 мың тоннадан астам көмір жатыр. Бюджеттік ұйымдар жылыту маусымында 146 мың тонна көмір жағады, қазір 124 мың тоннасы жеткізілді. Жалпы денсаулық сақтау, білім беру ұйымдары қысқы жылыту маусымына 99% дайын», - деді басқарма басшысы.
Бұған дейін СҚО-дағы 50 шақты мектепте интернет жылдамдығы өте төмен екендігін жазған едік.
