СҚО-да жоғалып кеткен 6 жасар баланы төртінші күн іздеуде
Хабарламаға сәйкес, 5 шілдеде Ғ. Мүсірепов атындағы ауданның Старобелка ауылында Ресейден анасымен бірге туыстарына қонаққа келген ер бала жоғалып кетті. Куәгерлер алты жасар Матвей Буровик 16.00-де туыстарының үйінен белгісіз бағытқа шығып кетіп, хабар-ошарсыз кеткенін айтады.
Бұл күні ТЖД-да жедел штаб құрылып, ауданға іздеу жұмыстарын жүргізу үшін күштер мен құралдар жіберілді.
ТЖД, АІІБ, жергілікті атқарушы органдар қызметкерлері, ауыл тұрғындары жоғалған баланы жаяу іздей бастады. Ауыл маңы метр-метрмен тексеріліп, іздеу ауданы сағат сайын кеңейді.
Елді мекеннен 10 шақырымда баланың заттары: баланың трикосы мен шұлығы табылды, оны туыстары таныды, ал бала табылған жоқ.
Жаяу іздеу нәтижелері сәтсіз болғандықтан, «Неженка Ерке» ЖШС-ның АН-2 ұшағы және аудандық ІІБ квадрокоптері жұмылдырылды. Полицейлер іздеу жұмысына итті де тартты, алайда жаңбыр мен орманға химикат себілуіне байланысты ит ізге түсе алмады.
Бүгін көлікпен, атпен жергілікті жерді айнала іздеу жұмыстары қолға алынды. Радиусы - 25 шақырым. Орман, дала алқаптары, батпақты жерлер қамтылуда. ТЖД құтқару жасағының сүңгуірлері екінші күн ауыл жанындағы Ұлыкөл өзенін тексеруде.
Іздеу жұмыстарына 160 адам, 18 бірлік техника тартылды. Іздеу әзірге нәтиже бермеді. Құтқарушылар баланы табатынына үміттерін жоғалтпауда, іздеуге бар күштерін салуда, деді Руслан Иманқұлов.
