Студенттердің жатақхана мәселесін шешуге арналған бірыңғай желі қосылды
АСТАНА. KAZINFORM — Биыл 10 576 орындық 27 жатақхана пайдалануға беріледі. Бұл туралы Үкімет отырысында Ғылым және жоғары білім министрі Саясат Нұрбек мәлім етті.
«Студенттер үшін оқу жылының басында маңызды мәселелердің бірі – жатақхана мәселесі. Қазіргі кезде Алматы мен Астана қалаларында жатақхана бойынша қиындық бар. Бұл мақсатта жатақханалар салуға арналған мемлекеттік тапсырыс механизмі оңтайландырылды», - деді С.Нұрбек.
Сонымен қатар министрлік бағдарламалық мемлекеттік және жекешелік серіктестік енгізу бағытында жұмыс атқарып жатыр. Жеке инвесторларды тарту механизмі (30% мемлекеттен және 70% инвестордан) жоғары оқу орындарының инфрақұрылымын нығайтуға бағытталған.
«Жалпы, 2024 жылға 10 576 орындық 27 жатақхананы тапсыру жоспарланған (оның ішінде ЖОО студенттері үшін 8 473 орындық 19 жатақхана, колледж студенттеріне 2 103 орындық 8 жатақхана)», - деді министр.
Ведомство мәліметіне қарағанда, қазіргі кезде 2369 орындық 10 жатақхана іске қосылды (Түркістан облысында 70 орындық 1 жатақхана, Жамбыл облысында 100 орындық 1 жатақхана, Атырау облысында 490 орындық 1 жатақхана, Павлодар облысында 189 орындық 1 жатақхана, Алматы қаласында 490 орындық 2 жатақхана, Шымкент қаласында 930 орындық 3 жатақхана).
С.Нұрбектің сөзіне қарағанда, студенттердің оқу жылының басында көптеп келуін ескере отырып, министрлік бірыңғай колл-орталық және ахуал орталығын ұйымдастырды. Сондай-ақ, студенттерді жатақханаларға орналастыру күндерінде әрбір жоғары оқу орнында көмекке мұқтаж студентті қолдау үшін тиісті орталықтар жұмыс істейтін болады.
«Қазірдің өзінде бұл желіге телефон шалуға болады. Кез келген студент бұл нөмірлерге хабарласып, жатақханаға қатысты толық ақпарат алады. Ешкімді далада қалдырмаймыз», - деді министр Kazinform тілшісіне берген сұхбатында.
Бұдан бұрын хабарланғандай, бүгін Үкімет отырысында Премьер-Министр Олжас Бектенов қалаға келген бірде-бір студент баспанасыз қалмауы тиіс екенін тапсырды.
