Студенттерге арналған жеңілдетілген несие 40 мың оқушыны қамтуы керек болса, бүгінгі күні тек 400 студент қана аталған несиеге қол жеткізген

АСТАНА. Мамырдың 26-сы. ҚазАқпарат /Қанат Мәметқазыұлы/ - Бүгін «Нұр Отан» ХДП Орталық аппаратында Партиялық бақылау комитетінің және Дағдарысқа қарсы бағдарлама аясында бөлінген мемлекет қаражатының пайдалануын бақылау жөніндегі комиссияның отырысы болып өтті,

деп хабарлайды ҚазАқпарат. Жиын барысында Елбасының тапсырмасы бойынша республикамыздағы жоғары оқу орындарында ақылы негізде білім алатын студенттерге ұзақ мерзімді несиелер, сондай-ақ қосымша мемлекеттік білім алу гранттарын бөлу жұмыстарының орындалу барысы талқыланды. Естеріңізге сала кетейік, Мемлекет басшысы Н. Назарбаев «Нұр Отан» партиясы Саяси кеңесі Бюросының отырысында Үкіметке еліміздің жоғары оқу орындарында ақылы негізде оқитын студенттерді қолдау мақсатында үшінші курстан бастап оқу озаттары болып табылатын 10 мыңнан астам студентке арналған қосымша мемлекеттік білім беру гранттарын бөлуді, сонымен қатар жетім, аз қамтылған және көпбалалы отбасыларынан шыққан, ақылы негізде оқитын үлгерімі жақсы және өте жақсы студенттер үшін техникалық және медициналық мамандықтар бойынша бірінші курстан бастап ұзақ мерзімді жеңілдетілген несие бөлуді тапсырған болатын. Бұндай несие Білім және ғылым министрлігінің есебіне сәйкес 40 мыңға жуық студентті қамтып, бұл мақсатқа 15 млрд. теңгеге жуық қаражат бөлінуі тиіс еді. Өкінішке қарай, осы уақыт аралығында 40 мың студенттің тек 403-і ғана жеңілдетілген несиеге қол жеткізген болып отыр. Ал бағдарламаны орындаушы агент-банк болып табылатын «Альянс-банк» АҚ-ына осы уақытқа дейін 1 млрд. теңгеге жуық қаражат бөлінсе, оның тек 27 млн. теңгесі ғана игерілген. «Елбасы бастамасымен жүзеге асуы тиіс бұндай шара өте баяу жүріп жатыр. Бұған кім кінәлі? Мүмкін несие шарттарын тұжырымдамалы түрде өзгерту қажет болар. Бәлкім несие қамтымдылығы бойынша ақпараттық-насихаттық қолдау дұрыс жүргізілмей отыр ма? Осы мәселенің себебін анықтап алу керек. Өйткені депутаттар өңірлерде болғанда барлық өтініштердің үштен бірі дәл осы студенттік несиелерге байланысты туындады. Бүгінгі жиында аталған проблеманы жан-жақты талқылап қорытынды шығаруға тиіспіз», - деді басқосуға жетекшілік еткен комиссия төрайымы Гүлжан Қарағұсова. Аталған мәселе бойынша баяндама жасаған Білім және ғылым вице-министрі Күләш Шәмшидинова, студенттік несие бағдарламасының алғашқы кезеңі бойынша 3 мың 151 студент өтініш бергенін айта келе, олардың тиісті талапқа сәйкес келмейтін 2 мың 425-і жазбаша түрде өтініштерін қайтарып алғанын атап өтті. «Осыған орай, жалпы 596 студент жеңілдетілген несие бойынша өтініш берген болып табылады. Мамырдың 25-індегі жағдай бойынша 27 млн. теңгені құрайтын 403 өтініш қанағаттандырылған. Қазіргі кезде келіп түскен өтініштер бойынша жоғары оқу орындарымен, банктермен бірлескен жұмыстар жалғасын табуда», - деді вице-министр.