Су басқан өңірлерге қажет тауарларды дрондар тасиды
АСТАНА. KAZINFORM – Су тасқынына ұшыраған өңірлерге гуманитарлық көмекті дрондар арқылы жеткізеді. Бұл туралы Цифрлық даму, инновациялар және аэроғарыш өнеркәсібі министрлігінің ресми өкілі Альбина Әтен мәлім етті.
«Су тасқынымен күрес жағдайынан IT-қауымдастығы тыс қалмай, дрондар арқылы гуманитарлық көмек жеткізуге көмектеспек. АҚШ-та жүзеге асырылып жатқан отандасымыздың жобасы яғни «ARC Drones» компаниясы көмекке келіп, қазірдің өзінде 3 дронды Құлсары, Көкшетау және Петропавл қаласына жіберуді жоспарлап отыр. Дрондар 20 келіге дейінгі жүкті жедел және үздіксіз жеткізе алады», - деді Альбина Әтен Орталық коммуникациялар қызметі алаңында өткен баспасөз мәслихатында.
Оның айтуынша, дрондардың көмегімен өмірлік маңызы бар тауарлар мен медициналық қажеттіліктер (дәрі-дәрмек, қан, вакциналар) жеткізіледі.
