Су реформасы: Ұлттық гидрогеологиялық қызмет құру ұсынылады
АСТАНА. ҚазАқпарат – Су шаруашылығы проблемаларын шешу бағытында қандай шаралар атқарылады? Мемлекет басшысының Жолдауда белгілеген тапсырмаларының орындалуы туралы Экология және табиғи ресурстар вице-министрі Ғалидолла Азидуллин Үкімет отырысында баяндады, деп хабарлайды ҚазАқпарат ведомство сайтына сілтеме жасап.
Қазақстандағы орташа көпжылдық өзен ресурстары жылына 102,3 км3 болады, оның 54,5 км3/жыл – жергілікті ағын, ал 47,8 км3/жыл – Орталық Азия мемлекеттерінен, Ресей Федерациясынан және Қытай Халық Республикасынан келеді. Осыған байланысты трансшекаралық ынтымақтастық жөніндегі жұмыс күшейтілетін болады. Президенттің 15 қолданыстағы және жаңа 20 су қоймасын салу, кемінде 3 500 км каналды жаңғырту және цифрландыру туралы тапсырмасын орындау мақсатында «Жасыл Қазақстан» ұлттық жобасы шеңберінде 2025 жылға дейін 16 жаңа су қоймасы қайта жаңартылып, 9 жаңа су қоймасы салынады, 212 суару каналы жөнделіп, цифрландырылады. Осы бағыттар бойынша одан әрі жұмыс су ресурстарын басқару жүйесін дамыту тұжырымдамасы шеңберінде жалғастырылады.
«Мемлекет басшысы өз Жолдауында жылына 150 мың гектарға дейін озық су үнемдеу технологияларын енгізу қажеттігін атап өтті. Су үнемдеу технологиялары қолданылатын аумақты 2023 жылы 300 мың гектарға, 2025 жылы 450 мың гектарға, 2030 жылға қарай 750 мың гектарға жеткізу жоспарланған. Тиісінше агроөнеркәсіптік кешенді дамыту жөніндегі бағдарламалық құжаттың қолданыстағы жоспарларын қайта қарау қажет болады. Су кодексінің жобасына «ауыз сумен жабдықтау туралы», «суару және дренаж туралы» және «бөгеттердің қауіпсіздігі туралы» бөлімдерді қосу арқылы коммуналдық-тұрмыстық сумен жабдықтауда және «Суармалы егіншілікте суды пайдалану» жөніндегі нормаларды күшейту жоспарланып отыр. Бұл ретте, бөгеттердің қауіпсіздігін бақылауды өнеркәсіптік қауіпсіздік органына жүктеу ұсынылады», - деп атап өтті Ғалидолла Азидуллин.
Вице-министр су саласында жаңа тарифтік саясатты енгізу тәсілдерін әзірлеу бөлігінде суды тиімді пайдалануға және ғылыми-техникалық прогресс есебінен артық пайдалануды азайтуға шоғырланған сұраныс пен ұсыныс арасындағы тепе-теңдікті сақтау қажет екенін атап өтті.
Ведомстволық Қазақ Су шаруашылығы ғылыми-зерттеу институтының базасында Ұлттық гидрогеологиялық қызмет құру ұсынылады, оның құрамына су саласының жетекші отандық ғылыми ұйымдары кіреді.
Сондай-ақ, вице-министр «Қазсушар» РМК және «Нұра топтық су құбыры» трансформациясы оларды «Qazsu» АҚ-ға айналдыру жолымен жүргізілетінін хабарлады.
«Кәсіпорындарға экологиялық аудит жүргізу бөлігінде 5 жылда бір рет қолданыстағы заңнамаға өзгерістер енгізу қажет. Көміртекті бейтараптыққа қол жеткізу жөніндегі мақсаттарды қамтамасыз ету үшін жыл сайынғы СО2 шығарындыларын 2,5%-ға дейін қысқарту мөлшерлемесімен парниктік газдар шығарындыларының сауда жүйесі жетілдірілетін болады, бұл жүйені шығарындылар саудасының еуропалық жүйесімен жақындастыру жоспарланған. Бұл бағыттағы жұмыс өте маңызды және декарбонизация мақсаттарына қол жеткізуге ықпал етеді», - деп қорытындылады Ғалидолла Азидуллин.
