Су тасқыны: БҚО-да демеушілік қаражаттың жұмсалуына байланысты қылмыстық іс қозғалды
ОРАЛ. KAZINFORM – Батыс Қазақстан облысында көктемгі су тасқынына дайындық кезеңінде өткен жылы жіберілген кемшіліктер биыл да қайталанып отыр.
БҚО прокурорының бірінші орынбасары Дәурен Омарғалиевтің мәлім еткеніндей, өткен жылы су тасқынына қарсы іс-шаралар жоспарының орындалмауына байланысты 7 лауазымды қызметкер тәртіптік, тағы екеуі әкімшілік жауапкершілікке тартылған болатын.
Оның сөзіне қарағанда, биыл облыс әкімінің 10 қаңтардағы өкіміне сәйкес су тасқынына қарсы жұмыстарды ұйымдастыру бойынша 1 ақпанға дейін штаб құру қажет болды.
Алайда бұл тапсырма орындалмай, Орал қаласында әкімдік штабты уақытында құрмаған. Тек прокуратура сынынан кейін штаб жасақталды.
— Сондай-ақ Қаратөбе ауданында су тасқынына дайындық жоспары алдыңғы жылмен бірдей, яғни жай көшіріліп алынған. Өткен жылы мұнда Қоржын ауылының түгелдей су астында қалғаны мәлім. Сол секілді Жаңақала ауданында да жоспар сапасыз әзірленген. Осындай кемшіліктер үшін Орал қаласы мен Қаратөбе ауданының басшысы және Жаңақала ауданы әкімінің орынбасары тәртіптік жауапкершілікке тартылды, — дейді БҚО прокурорының бірінші орынбасары.
Оның айтуынша, өңірде 57 бөгеттің құрылысы басталғанымен, 58 ауыл су басу қаупінен құтылған жоқ. Бұл жұмыс бойынша да шағымдар бар. Атап айтқанда, Бәйтерек ауданында 19 бөгет бойынша жобаларға сараптама жеке ұйымда («Smart Build Expertise» ЖШС) жүргізілген. Шын мәнісінде бұл жобалар мемлекеттік сараптамадан өткізілуі керек болатын.
Прокуратура мәліметіне қарағанда, өткен жылы су тасқынынан зардап шеккен азаматтар мен кәсіпкерлерге көмек есебінде 81 млрд теңге жұмсалды. Соның 13 миллиарды бюджеттен, 68 млрд теңгесі демеушілер есебінен бөлінді.
— Бүгінгі таңда Қаржы мониторингі агенттігі Перизат Қайраттың қылмыстық іс-әрекетін тергеп-тексеріп жатыр. Өкінішке қарай, мұның біздің облысқа да қатысы бар. Сонымен қатар күні бүгін БҚО бойынша сыбайлас жемқорлыққа қарсы қызмет демеушілердің қаражатынан ұрлау белгілері бойынша сотқа дейінгі тергеп-тексеруді бастады. Зардап шеккендерге көмек көрсетуге арналған ақшамен байланысты қылмыстық істерді тіркеудің бірнеше фактісін және қаржыландырудың «Ақжайық» жеке қоры арқылы жүргізілгенін ескере отырып, оның қайырымдылық қаражатын пайдалануға қатысты қызметі тексерілетін болады, — деді Дәурен Омарғалиев.
Еске сала кетейік, бұдан бұрын Батыс Қазақстанда тасқын судан келер қауіп қандай екендігін жазған болатынбыз.
