Сұлтан Заурбек: Matchroom Boxing промоутерлік компаниясынан ұсыныс түсті

АСТАНА. KAZINFORM – Қазақстандық кәсіпқой боксшы Сұлтан Заурбек (19-0, 13КО) болашақта танымал британиялық Matchroom Boxing промоутерлік компаниясымен келісімшарт жасасуы мүмкін. 

Бұл туралы боксшы бүгін Астанада өткен «Battle of the Brave» бокс кешінің баспасөз конферанциясында Kazinform тілшісіне айтты. 

Сұлтан Заурбек қазіргі уақытта англиялық Wasserman Boxing промоутерлік компаниясы аясында жұдырықтасып жүргенін атап өтті. 

– Бірнеше жыл бойы осы компаниямен және бір менеджермен бірге жұмыс істеп келеміз. Бізге Matchroom Boxing промоутерлік компаниясынан ұсыныс түсті. Қазіргі уақытта менеджерім келіссөз жүргізіп жатыр, - деді ол. 

Өз кезегінде қазақстандық боксшы бұл жақсы мүмкіндік екенін жасырмады. 

– Егер келісімге келе алсақ, біз бірден 5-6 айқас өткізуге шарт жасасамыз. Әрине, рейтингіде алдыңғы қатардағы боксшы болғандықтан, Matchroom бізге чемпиондық жекпе-жек өткізуге мүмкіндік жасап бере алады, - деді Сұлтан Заурбек.

Айта кетейік, Сұлтан Заурбек 5 сәуір күні Астанада өтетін кәсіпқой бокс кешінде шаршы алаңға шығып, Оңтүстік Африка өкілі Азинга Фузилемен (18-2, 12КО) жұдырықтасады. 

Қазіргі уақытта, қазақстандық боксшы супер жеңіл салмақта әлемдік рейтингіде 21-орында, ал IBF нұсқасы бойынша 5-орында тұр.

Еске сала кетсек, Жәнібек Әлімханұлы 5 сәуір күні Астана қаласында кезекті жекпе-жегін өткізіп, чемпиондық белдіктерін қорғайды. Кәсіпқой бокс кеші елордадағы «Барыс арена» спорт кешенінде өтеді.