Сұлулығынан амбициясы ғана асып түседі — Павел Дуров Қазақстан жайлы не жазды
АСТАНА. KAZINFORM — Кәсіпкер, Telegram негізін қалаушы Павел Дуров Қазақстанға сапарынан алған әсерін бөлісті.
«Жақында Орталық Азияның экономикалық қуатты орталығы — Қазақстаннан оралдым. Айбынды Астанада, жарқ-жұрқ еткен Алматыда, көркем Бурабайда және табиғаты тамаша Шарын шатқалында болдым. Қазақстанның сұлулығынан оның амбициялары ғана асып түсе алады. Ел бизнеске жайлы саясаты мен қолайлы салығы арқылы халықаралық компаниялар мен технологиялық стартаптарды өзіне тартады. Ол сондай-ақ инновациялық мектептер мен университеттерді қолдау арқылы білім мен ғылымдағы жетістіктерін еселеп отыр»,-деп жазды Павел Дуров Telegram парақшасында.
Оның айтуынша, 20 млн қазақстандықтың 12,5 миллионы ай сайын Telegram пайдаланады.
Бұл өткен жылмен салыстырғанда 25 пайызға артық.
«Біз қазақ халқының негізгі коммуникациялық алаңы бола алғанымызды мақтан етеміз және оның жылдам экономикалық және цифрлық трансформациясын жеделдететін құрал болып қала береміз деген үміттеміз» дейді бизнесмен.
