Таеквондодан ұлттық құраманың бас бапкері тағайындалды
НҰР-СҰЛТАН. ҚазАқпарат - Таеквондодан Қазақстан ұлттық құрамасының бас бапкері ауысты, деп хабарлайды ҚазАқпарат.
ҚР Ұлттық олимпиада комитетінен мәлім еткендей, Ұлттық құраманың бас бапкері қызметіне Батырбек Еставлетов келді. Сондай-ақ Серік Палмағамбетов мемлекеттік жаттықтырушы қызметіне кірісті.
Батырбек Еставлетов осыған дейін таеквондодан Қазақстан құрамасының аға жаттықтырушысы қызметін атқарған. Халықаралық дәрежедегі спорт шебері, 1997-2007 жылдар аралығында ҚР чемпионы және ҚР Кубогы иегері, Жазғы спартакиада жеңімпазы, Азия чемпионатының және бірқатар халықаралық турнир жүлдегері.
