Талдықорған қаласының тұрғыны көпқабатты үйдің ауласын гүлденген баққа айналдырған

ТАЛДЫҚОРҒАН. KAZINFORM – Жетісулық Ольга Серебренникова үйдің кіреберіс тұсына жыл сайын сан түрлі гүл өсіреді. Сөзінше гүлдері қара суық түскенше өңін бермейді. 11 жыл ішінде әуесқой бағбан гүлдің жүздеген түрін өсіріп келеді. Бүгінде ауласында 60-тан астам өсімдіктің түрі бар. 

«Медицина саласында жұмыс істедім. Зейнеткерлікке шыққаннан кейін бос уақытым көбейді, сосын гүл өсірумен айналыса бастадым. Әртүрлі гүл өсіремін. Шырайгүл, түймедақ, балшатыр, бақытгүл, астра, барқытгүл, қоңыраугүл және т.б. Ал, бөртегүл көктемде гүлдейді. Жалпы гүлдің 60-тан астам түрі бар. Әсіресе тас раушан – өте ерекше гүл. Үйімнің ауласынан өз қолыммен гүлзар жасадым. Басқа да гүл өсірушілермен араласып тұрамын. Бір-бірімізбен тәжірибе алмасамыз, бір-бірімізге көшет, тұқым береміз. Біз оазис жасап отырмыз, соны күтеміз, суарамыз. Әрі әдемі, әрі пайдалы. Көршілерге де ұнайды, олар бізге қолдау көрсетеді, бірге қуанады, балалар да гүлге ұқыпты қарайды», - деді Ольга Серебренникова.

Облыс орталығының тағы бір тұрғыны өз ауласын көгалдандырумен 15 жылдан бері айналысып келеді. Ол 50 сотық жерге үлкен гүлзар жасап, жеміс ағаштарын өсіріп отыр. Ләззат Асанова көшесіндегі № 69 көпқабатты үйдің ауласын баққа айналдырған Татьяна Ибрагимованың сөзінше, ол гүлдің жаңа сорттарын отырғызуды жоспарлап отыр. 

Жалпы, Талдықорған қаласы әкімдігінің мәліметіне қарағанда, биыл облыс орталығында «Үлгілі аула» байқауы өтеді. Байқаудың басты мақсаты – қаланың кескін-келбетін жақсарту. Сондай-ақ аула аумақтарының санитарлық жағдайы мен көгалдандырылуын, абаттандырылуын қолға алу.