Талдықорғанда 100-ге жуық отбасына пәтер кілттері табысталды
Астананың 25 жылдық мерейтойы қарасаңында Талдықорған қаласындағы «Бірлік» шағынауданында «Нұрлы жер» бағдарламасы бойынша салынған 5, 7, 9 қабатты тұрғын үй пайдалануға берілді.
«Талдықорған қаласында 15 мың адам үй кезегінде тұр. Ендігі біздің міндетіміз – кезекте тұрғандардың санын екі есе қысқарту. Ол үшін жылына кемінде 1500-2000 шаршы метр үй беруіміз керек. Осыған дейін кезекке байланысты түсінбеуішілік, заңсыздықтар болды. Тұрғындар кезегін цифрлық жүйеге көшірдік. Енді кез келген адам өз кезегін үйінде отырып-ақ бақылай алады. Қуаныштарыңыз ұзаққа созылсын. Осы үйде өніп-өсіп, бақытты ғұмыр кешіңіздер!» - деді облыс әкімі Бейбіт Исабаев кілт табыстау салтанатында.
Бұл үйдің құрылысы 2020 жылы басталған болатын. 98 пәтердің 42-сі – 1 бөлмелі, 28-і – 2 бөлмелі, 28-і – үш бөлмелі пәтер.
Айта кетсек, Талдықорған қаласында жыл басынан бері 280 адам баспаналы болды. Енді жыл соңына дейін тағы 1 700 адам үй алады. Нәтижесінде 51 үй пайдануға беріледі. Олардың басым бөлігі көпбалалы отбасылар, ата-ана қамқорлығынсыз қалғандар, ардагерлер мен І, ІІ топ мүгедектері.
Еске салсақ, Талдықорғанда 13 адамға оңай жолмен пәтер алуға уәде беріп, жәбірленушілердің 18 млн теңгесін иемденген 2 адам сотталды.
