Танк батальонының командирі мен ауылдық округ әкімінің міндетін атқарушы жемқорлық жасауда ұсталды - жамбылдық қаржы полициясы
ТАРАЗ. 18 қазан. ҚазАқпарат - Жамбыл облысы бойынша экономикалық қылмысқа және сыбайлас жемқорлыққа қарсы күрес департаменті (қаржы полициясы) пара алғаны үшін ҚР ҚМ 21450 әскери бөлімі жанындағы резервтік бригаданың 2-ші танк батальоны командиріне қатысты қылмыстық іс қозғады.
«2012 жылдың 27 қыркүйегінде бұл азамат аға техниктен қызметін жоғарылату бойынша бұған дейін жасаған көмегі мен жалпы қолдауы үшін 30 мың теңге көлемінде пара алды», - деп хабарлады экономикалық қылмысқа және сыбайлас жемқорлыққа қарсы күрес департаментінің баспасөз қызметінен.
Бұдан басқа, қаржы полициясы Байзақ ауданына қарасты ауылдық округтердің бірінің әкімінің міндетін атқарушыға қатысты ҚР ҚК-нің 314-бабы (қызметтік жалғандық) бойынша қылмыстық іс қозғады.
«2007-2010 жылдары жауапты мемлекеттік қызметтегі тұлға бола тұрып, өзіне және өзге тұлғаларға пайда мен артықшылықтарды алу мақсатында ресми құжаттарға көрінеу жалған мәліметтерді енгізу арқылы С. есімді азамат қызметтік жалғандық жасады», - деп хабарлады қаржы полициясының баспасөз қызметінен.
Естеріңізге сала кетейік, жақында Жамбыл облысы бойынша қаржы полициясының департаменті аймақтың мемлекеттік органдарындағы жемқорлық фактілері бойынша бірқатар қылмыстық істерді қозғады.
