Танымал қазақстандық әнші Жанна Саттарова қайтыс болды
Бұл туралы әншінің әпкесі Гауһар Саттарова мәлім етті. «Жанночка қайтыс болды», - деп жазды ол өзінің Facebook парақшасына.
2014 жылдың қазан айында Жанна Саттарова қатерлі ісік дертіне шалдыққан еді. Әншінің өзі аурудың соңғы сатыларында анықталғанын айтты. 2016 жылдың ақпан айында ол Бүкіләлемдік қатерлі ісікке күрес күніне арналған баспасөз мәслихатына қатысты.
Жаннаға көмек беру үшін қазақстандық джаз ханшайымының достары мен жақындары қайырымдылық концерттерін ұйымдастырды. Атап айтқанда, 2017 жылдың ақпан айында әншінің еміне қаражат жинау үшін қайырымдылық жәрмеңкесі ұйымдастырылды, оған қазақстандық эстраданың танымал әртістері қатысты.
Жанна Оңтүстік Корея мен Францияда ем қабылдады, әйтсе де ауыр дерт алмай қоймады.
Жанна Саттарова Қазақстандағы және шет мемлекеттердегі джаз әуесқойлары арасында кеңінен танымал еді.