Таразда қаңтар қырғынында ұрланған 6 қару, гранаталар мен патрондар табылды
ТАРАЗ. ҚазАқпарат - Жамбылдық полицейлер 6 қару, гранаталар және 200-ден астам патрон тапты, деп хабарлайды ҚазАқпарат.
Жамбыл облысы полиция департаментінің қызметкерлері жаппай тәртіпсіздік барысында ұрланған қаруды табу үшін күн сайын іздестіру жұмысын жүргізеді.
Жедел іздестіру кезінде полиция қызметкерлері облыс орталығының аумағынан 6 қару, 3 граната, 5 оқ жатар, резеңке таяқ және 216 патронды тапты.
Қару-жарақтың ішінде граната атқыш, шолақ және тегіс ұңғылы мылтық, Макаров тапаншасы, МР-355 тапаншасы, соғыс, газ және жарық-шу гранаталары, тапаншаның 5 оқ жатары және әртүрлі калибрлі 216 патрон болды.
Табылған қаруларға сот-баллистикалық сараптама тағайындалды.
Айта кетейік, қарудың, оқ-дәрінің, арнайы құралдардың қайда екенін хабарлаған немесе оларды полицияға өз еркімен тапсырған адам басқа құқық бұзушылықтарға қатысы болмаса, қылмыстық және әкімшілік жауапкершілікке тартылмайды.
Хабарлаған адамның жасырын қалуына кепілдік беріледі.
