Таразда жоғары лауазымды полиция қызметкерлеріне қатысты сот аяқталуға жақын

Тараз қаласының № 2 сотында Жамбыл облысы полиция департаменті бастығының бұрынғы орынбасары Жайдарбек Құттыбаев пен Талас аудандық полиция бөлімінің бұрынғы уақытша бастығы Еркен Абаевқа қатысты іс бойынша сот процесі соңғы кезеңге жетті.

Мемлекеттік айыптаушы Жайдарбек Құттыбаевты 6 жылға, Еркен Абаевты 5 жылға бас бостандығынан айыруды сұрады. Сонымен қатар прокурор сотталушыларды арнаулы атақтарынан айырып, болашақта құқық қорғау органдарында қызмет атқару құқығынан айыруды ұсынды.

Жайдарбек Құттыбаевқа ҚР Қылмыстық кодексінің 190-бабы 3-бөлігінің 1 және 2-тармақтары бойынша (қызметтік жағдайын пайдалана отырып, мемлекеттік функцияларды орындауға уәкілетті адамның ірі мөлшерде жасаған алаяқтығы) айып тағылған.

Ал Еркен Абаевқа ҚК-нің 28-бабының 5-бөлігі және 367-бабының 2-бөлігі бойынша (елеулі мөлшерде пара беруге жәрдемдесу) айып тағылып отыр.

Іс материалдарына сәйкес, жәбірленуші ретінде Қаратау қаласында қызмет атқарған бұрынғы полиция қызметкері танылған. Дәл осы адамның оқиғасы кейін оның басшыларына қарсы қылмыстық істің басталуына себеп болған. Аталған қызметкер бір адамды соққыға жыққаннан кейін оған қылмыстық іс қозғалып, ішкі істер органдарынан жұмыстан шығарылу қаупі төнген. Сол кезде Талас аудандық полиция бөлімінің сол кездегі уақытша бастығы Еркен Абаев мәселені Жамбыл облысы полиция департаменті бастығының орынбасары Жайдарбек Құттыбаев арқылы шешуді ұсынған. Мұның құны 5 млн теңге болған.

Тергеу нұсқасы бойынша, бұл қаражат полиция қызметкерінің шенін сақтап қалып, қылмыстық жауапкершіліктен толықтай құтылуына көмектесуі тиіс болған. Алайда қандай да бір себептермен істі жабу мүмкін болмаған.

Соған қарамастан іс сотқа дейінгі тергеп-тексеруге өтіп, кейін полиция қызметкері қамауға қамалды. Осыдан соң ол өз мәселесін шешу үшін ақша бергенін құқық қорғау органдарына хабарлаған.

Алдымен кадр мәселелері жөніндегі полиция департаменті бастығының бұрынғы орынбасары Жайдарбек Құттыбаев ұсталды. Ішкі істер министрінің 2025 жылғы 29 тамыздағы бұйрығымен ол қызметтен теріс себептермен босатылған. Кейін осы іс бойынша Еркен Абаев та қамауға алынды. Ол ұсталғанға дейін іздеуде жүрген.

Сот процесі биылғы ақпанда басталды. Алдын ала тыңдауда қорғаушылар істі тоқтатуды немесе оны прокурорға қайтаруды сұрап, тергеу барысында заң бұзушылықтарға жол берілгенін алға тартқан. Алайда сот бұл уәждермен келіспей, негізгі сот талқылауын тағайындады.

Қазір процесс аяқталуға жақын. Келесі аптада сотталушыларға соңғы сөз айту құқығы беріледі. Одан кейін сот үкім шығару үшін кеңесу бөлмесіне кетеді.

Бұған дейін Ақтөбеде пара алған полиция қызметкерлері сотталғанын жазғанбыз. Екеуі де теміржолдағы тәртіпке жауапты болған.