Tartyl Fest: Бүгін турникке тартылудан жарыс Талдықорғанда өтеді

ТАЛДЫҚОРҒАН. ҚазАқпарат – Бүгін Жетісу облысының орталығы Талдықорған қаласында кермеге тартылудан Tartyl Fest фестивалі өтеді. Республиканың барлық өңірін қамтитын бұқаралық дода 10-шілдеде Қонаев қаласында басталған болатын, деп хабарлайды ҚазАқпарат.

Айта кетейік, Tartyl Fest республикалық спорт фестиваліне ҚР Президенті жанындағы «Дара» таланттарды қолдау қоры мен Жетісу облысы әкімдігі қолдау білдірген. Бүгінгі спорттық шара қалалық «Жастар» паркінде өтуде. Жасы мен салмағына қарай қатысушылар 9 санатта сынға түседі. Жарысты ресми төрешілер алқасы қадағалайды.

Фестиваль 10 шілде мен 6 қыркүйек арасында еліміздің 20 қаласында ұйымдастырылады деп жоспарланған. Қатысушыларға ақшалай сыйлықтар қарастырылған.

Өңірлерден іріктелген жеңімпаздар ( 9 санат бойынша) Нұр-Сұлтан қаласындағы гранд-финалға қатысады. Гранд-финалдың жүлде қоры – 54 млн теңге. Ал жарыс чемпионы Street Workout бойынша әлемдік чемпионатқа жолдама алады.

Street Workout – әуесқойлар спортының бір түрі, бұл ауладағы спорт алаңында түрлі жаттығуларға арналған.