Тәуелсіздік тойына өнер саласының қызметкерлері де үлкен табыстармен келіп отыр - Қ.Қожақов, Қазақстанның еңбек сіңірген әртісі, БҚО

АЛ. 21 қараша. ҚазАқпарат /Елжан Ералы/ - Ел тәуелсіздігінің 20 жыл­­дығына өңірдің мә­де­ниет саласы қызмет­кер­лері де үлкен табыстармен келіп отыр,

дейді белгілі әнші, Қазақстанның еңбек сіңірген әртісі, Ғ.Құрманғалиев атындағы облыстық филармония директорының орынбасары Қанатқали Қожақов.

-Айта кететін жайт, облыс әкімі Бақтықожа Ізмұхамбетовтің өнер адамдарына деген қам­қор­лығы арқасында сала қызметкерлерінің тынысы кеңейіп, талғам үдесінен шығып келеді, деді ол. Соның бір жарқын айғағы - елордада үш облыс­тың бірлескен концерттік бағ­дар­ламасындағы 17 нөмірдің 13-і ба­тысқазақстандықтардың үле­сін­д­е. Бұл облыс өнерпаздарының өнер көгінде жарқыраған елеулі күндерінің бірі болды десем қателеспеген шығармын.

Тәуелсіздік мә­дениет саласына тың серпін әкелді. Әрине, осы 20 жылдың ішіндегі өзгерістердің бәрі бірдей қолға алынып, өрлеп кетті деу қиын. Дегенмен соңғы жыл­дардағы өзгеріс ұшан-теңіз. Алыс­қа бармай-ақ, өзім еңбек ететін Ғ.Құрманғалиев атындағы об­лыс­тық филармония ұжымына тоқ­та­лайын. Керемет залымыз, концерттік бағдарламамыз, ең бастысы - өнеріне таң қалдырып, сах­наны гүлдендіріп жіберетін өнер­паздарымыз бар. Филармония директоры Марат Қалиев, көркемдік жетекші, Қазақстанның еңбек сі­ңірген қайраткері, тәжірибелі ма­ман Мақсот Омарғалиевтің бас­шылығымен өнерімізді дамыта тү­суге бар мүмкіндік жасалып отыр. Филармонияның аға буын өкілдері Қатимолла Бердіғалиев, Ермек Қазиев тағы басқа майталмандар өз тәжірибелерін жастарға үйретуден жалықпауда. Жаңыл­сын Хасанова, Марат Сарбөпеев, Жас­келең Ғайсағалиев, Еркін Өте­генов, Асыланбек Қуанәлиев сияқ­ты ізбасарларымыз бар.

«Назерке» би ансамблінің гүл­дей майысқан бишілерінің өнеріне ғана емес, киім үлгілеріне дейін таңғалып, таңдай қағып жатады. Дәулеткерей атындағы ұлт аспаптар оркестрі, «Орал сазы» ансамблінің шығармашылық дең­гейі өте жоғары. Оркестр, ансамбль құрамындағы қай өнерпазды алып қарасаң да саусағынан күй төгіліп жүре береді.

Біз үшін кеңестік дәуірде шетелге барып өнер көрсету деген өте сирек құбылыс болатын. Онда да бізді Кеңестер Одағы деп таныды. Қазір Қазақстанды дүниежүзі біледі. Шетелдік сапарларымызда қазақтың ұлттық аспаптарынан шығатын сан алуан әуенге, ұлттық нақыштағы киімдерімізге, кең тынысты, сан қырлы өнерімізге деген қызығушылық басым. Түрлі фестивальге қатысуға келген шетелдік өнер ұжымдары өздеріне шақырып, өнер көрсетуімізді сұ­райды. Бұл біз үшін дәреже ғана емес, ұлттық өнеріміз, тәуелсіз Қа­зақстанымыз үшін мақтаныш.

Өз басыма келсем, өнерім бағаланып, «Ерен еңбегі үшін» медалімен марапатталдым. Негізінен эстрадалық-симфониялық оркестрдің сүйемелдеуімен пат­риоттық әндерді орындаймы­н. Соңғы жылдары концертті­к бағ­дарламама жаңа әндер қосылды. Соның бірі - Ермұрат Үсеновтің «Арман - Астана» әні. Жерле­сі­міз Базарбай Жұманиязовтың шығармашылық кешіне арнап оның «Отан - Ана», «Алтын дән туралы жыр», «Кешкі ән» әндерін орындауға әзірлік үстіндемін. Сол сияқты Қаршыға Ахмедияровтың «Жер - Ана» әнін де тыңдарман­дар жақсы қабылдауда.

Шетелдерге, ТМД елдері мен көршілес Ресей қалаларына ба­рып өнер көрсетумен қатар, Ақ­төбе, Атырау қалаларының өнер ұжымдарымен де тығыз байланыстамыз. Сонымен қатар биыл бірнеше топқа бөлініп Қаратөбе, Жымпиты, Бөкей ордасы, Жаңақала, Қазталов, Жәнібек аудандарына барып, ауыл тұрғындарын әнмен сусындатып қайттық. Қуа­натынымыз - ауылда мәдениет жан­дана түскен. Тұрғындардың тұрмыс деңгейі көтеріліп, рухани азық берер мәдениет саласы да қалпына түскен. «Ел іші - өнер кеніші» деген ғой, біздің өнерімізді жалғастырар жастар солардың арасында.

«Бүгінгі таңда әнімізді шырқай жүре, облыстағы қоғамдық-саяси науқаннан да тыс қалмаудамыз. Сайлау кездерінде ақпараттық-насихаттық топпен бірге барып, концерт қоямыз. «Назерке» би ансамблі ел тәуелсіздігінің 20 жылдығына арналып, Астанад­а өтетін гала-концертке әзірлік үс­­тінде. Өзім желтоқсанның 16-17 жұлдызында елордаға облыстан баратын ресми делега­ция құрамында мәдениет қыз­меткерлері атынан қатысамын. Одан бөлек 14 желтоқсанда облыста өтетін салтанатты шараға, жаңажылдық кештерге қатысамыз. Қазір Тәуелсіздіктің 20 жылдығына орай көптеген шара­ өткізілуде. Соның бәріне үле­сімізді қосудамыз. Өйткені өнер - ортақ», деп түйіндеді ойын Қ.Қожақов.