Теннис: Александр Бублик Майами турнирінің үшінші айналымына шықты

НҰР-СҰЛТАН. ҚазАқпарат – Қазақстанның бірінші, әлемнің 44-ракеткасы Александр Бублик Майами ATP 1000 турнирінің үшінші айналымына шықты, деп хабарлайды ҚазАқпарат тілшісі.

Осы доданың 32-ракеткасы болып тіркелген А.Бублик жарысты екінші айналымнан бастап, рейтингте 57-орында тұрған сербиялық Ласло Дьеремен кездесті.

Қазақстандық теннисші бірінші партияда 6:3 есебімен басымдылық көрсетті. Екінші сетте де қарқынынан айырылған жоқ – 6:4.

Бәсеке 1 сағат 26 минутқа созылды.

А.Бублик төртінші айналымға шығу үшін әлемнің 104-ракеткасы, аустралиялық Джеймс Даквортпен таласады.

Ерлер мен әйелдер арасында өтіп жатқан Майами мастерс турнирі (жалпы жүлде қоры – 3,26 млн АҚШ доллары) 4 сәуірде мәреге жетеді.

Еске сала кетейік, бұдан бұрын Михаил Кукушкиннің Майами мастерс турнирін жеңіспен бастағанын, Елена Рыбакинаның үшінші айналымға шыққанын, Юлия Путинцеваның ұтылып қалғанын жазған болатынбыз.