Теннис: Путинцева Цинциннати жарысын жеңіспен бастады

НҰР-СҰЛТАН. ҚазАқпарат – Қазақстандық Юлия Путинцева Цинциннати (АҚШ) турнирін жеңіспен бастады, деп хабарлайды ҚазАқпарат тілшісі.

Әлемнің 33-ракеткасы Ю.Путинцева алғашқы айналымда рейтингте өзінен үш саты төмен тұрған қытайлық Чжан Шуаймен кездесті.

Бірінші партияда қазақстандық теннисші басымдылығын көрсете білді – 6:4.

Екінші сетте есеп 1:1 болған мезетте Ю.Путинцева брейкпен алға шыққанымен, қарсыласы да қалыспай, таразы басын қайта теңестірді – 2:2. Тағы бір брейктен кейін қазақстандық теннисші өз геймін де алды – 4:2. Ю.Путинцева матчты тағы бір брейкпен түйіндеді – 6:3.

Біршама тартысты өткен бәсеке 1 сағат 40 минутқа созылды.

Юлия екінші айналымда әлемнің 21-інші, осы доданың 13-ракеткасы, грекиялық Мария Саккаримен шеберлік байқасады. М.Саккари бірінші матчында америкалық 16 жастағы жас талант Кори Гауфты 6:1, 6:3 есебімен оңай ұтты.

Еске сала кетейік, бұдан бұрын Цинциннати турнирінде Александр Бубликтің де жарыс жолынан шығып қалғанын жазған болатынбыз.