Тимофей Скатов Испаниядағы турнирде төртінші кездесуін жеңіспен түйіндеді

АСТАНА. KAZINFORM — Қазақстандық теннисші, әлемнің 175-ракеткасы Тимофей Скатов Жирона (Испания) челленджер турнирінің ширек финалына шықты.

Қазақстандық теннисші іріктеу сайысында екі спортшыны ұтып, негізгі жарысқа қосылған еді.

Т.Скатов екінші айналымда дүниежүзілік рейтингіде 189-орында тұрған молдовалық Раду Алботпен бетпе-бет келді.

Бірінші партияда Скатов 6:4 есебімен басым түссе, екіншісінде Албот есе қайырды — 6:3.

Үшінші, шешуші сетте есеп 5:4 болып, матчқа доп бергенде, Тимофей сол мүмкіндігін пайдалана алмады. Дегенмен тай-брейкте қарсыласын тығырыққа тірей білді — 7:6 (7:3).

Үш сағат 37 минутқа созылған аса тартысты бәсекеде Скатов 2 эйспен бірге 16 брейк-пойнттың үшеуін пайдаланды. Албот 4 брейкпен көзге түсті.

Тимофей Скатов жартылай финалға шығу үшін әлемнің 108-інші, осы жарыстың 5-ракеткасы, сербиялық Душан Лайовичпен таласады. Ол рейтингіде 153-сатыдағы испаниялық Алехандро Моро Каниасты жолдан тайдырды — 6:2, 6:2.

Еске сала кетейік, бұдан бұрын Тимофей Скатовтың Испанияда жарыстың 3-ракеткасын ойсырата ұтқанын жазған болатынбыз.

Сондай-ақ Бейбіт Жұқаев Мексикадағы турнирдің ширек финалына шықты.